RINGTUTE TAWRHNA
Bible-ah hian Pathian mite tawrhna hi a lang hnem hle a. Thuthlung Thar lamah phei chuan ringtute’n Isua hming avangin an tuar tur a ni tih leh an tuarna thu kan hmu hnem viau a ni. Ringtu hmasa te hian eng hnam pawh ni se, eng ram pawh ni se tawrhna / tihduhdahna an hmachhawn zel niin a lang. Tawrhna chungchanga ka rilrua lo lang tlem ka’n tarlang ang e.
Pathian hi Engkimtithei, Engkim chunga Roreltu a ni si a; engvangin nge A mite hian an tawrh a ngaih tlat le? Isua kha Pathian Fapa a ni a, an man dawn zan khan a duh chuan Vantirhkoh tamtak amah chhan turin a ko thla thei tih a sawi a. Pathian hian engkim a tih theih si chuan engati nge tuara hrehawm tak khera min chhandam le!!
Ringtute leh sual indona hi mita hmuhtheih aiin mita hmuh theih loh, thlarau khawvelah hian a nasa zawk a nih ka ring a. A langa ringtute tihduhdah an niha an thih zawih zawiha an martar hian thlarau khawvelah Pathian sipaite nasa takin an chak phah a nih ka ring tlat!!
Sipai, ram tana inpe chuan thih a ngam loh tlat chuan thih ngama rawn beitu ral hmaah a tlanchhe ngei ang a; thih ngama a din tlat erawh chuan hnehna kawng a zawh tihna a ni ang. ‘Charge of the Light Brigade’ te kan zir thin a, mi tlemtein ral hmaa tlanchhe lova an beihdan phuahna poem a ni. ‘300’ film ah pawh Spartan mi 300 lekin Persia ho tam lutuk an lo beihdan kan hmu. An indona chu an thih phah ngei mai; mahse mi tam zawk kai thoa hnehna an chan theihna chhan chu tlanchhe loa an inpek ral raihna kha a ni tlat. Grik lal ropui Alexander-a chak em em chhan kha an sawi dan chuan ‘a tana thi ngam’ sipai a ngah vang niin an sawi tlat.
Pathian hian A tana thi ngam lo hlir ringtu nei ta se engtin nge a ram a zauh belh ang aw? Ring thar awmna apiangah tawrhna a awm a. Isua’n A hminga tawrhna chuan thlamuanna leh engthawlna a chhawm tih a sawi a. Ringtu hmasa te khan Isua hming avanga an tawrhna kha an lawmna a ni tlat! Martar te thisen chu Kohhran chi a ni a; Martar-na hi ringtute chawimawina dawn theih sang ber a ni.
Tunlai Kristian te hian tawrh hi kan hlau ta hle-in a lang a. Hmun hrang hranga ringtu dangte kan tawngtaisak pawhin tawrhna leh harsatna laka humhimna kan dilsak ta fo mai. Mizoramah ngei phei chuan nuam takin rawng kan bawl a, ringtute tan tawrh tur awm lo angin kan sawi fo thin bawk. Hei hi ngaihdan dik lo tak niin ka hria a. Mizoram, Kristian ram inti-ah pawh hian Pathian ringtu tak tak, nawmsakna ngaihtuah lova Pathian thu chauh ngaihsak chu tumahin kan kawm tha peih lo a, mite inpekna leh tawrhna atanga Pathian malsawmna an dawn te ngaihnawm taka kan sawi kan sawi lai hian mahni tana chu malsawmna dawng ve thei tur khawpin mi tam zawk hian kan tuar peih lo a, kan ngam lo thin a ni. ‘Ani hi chu a thlarau mi khawp mai’ tih hlawh tawhte reng reng hi chuan thian pawh an ngah ngai lo a, nula tan ngat phei chuan a mawi lo te kan ti hial thin. Tihdamna Pathianin a pek te kan pan ruih ruih lai hian Pathian hian min pe ve dawn ta se kan tih ve tur lam ti peih lo / ngam lo kan tam zawk ang.
Pathian kan hmangaih a nih chuan A tan kan tuar tur a ni a, A mite chuan pumpelhna leh humhimna zawng lovin chung zawng zawng karah pawh Ama tihchakna kan dil zawk tur a nih ka ring a. Pathian tana inpekna-ah hian ‘Tawrhna’ a tel tlat a, Pathian ram zauhna’n hian ‘Tawrhna’ hi ralthuam pawimawh berte zinga mi a ni tih ka pawm tlat a. Tuar ngam lo tan Pathian ringtu tak tak a nih theih ka ring lo!
No comments:
Post a Comment