ShoutMix chat widget

Sunday, December 19, 2010

Post 15: Sunday Pual - IX

A HMANGAIHNA ANG CHHUNGAH

Hmangaihin Isuan min tlan a
He khawvel finna hianin
A hre thiam mawlh si lo
Khawvel sual tuipui thimah hian
Ka lo vakvai thin a
Min rawn zawng hmu ta
A hmangaih ropui chuan

*A hmangaih ang chhungah
 Lawmna ka chhar ta
 A hmangaih ang chhungah
 Min hualhim thin
 Thlarau lungchhia leh vakvaite
 Min lo pawm duh si
 Ka hlau tawh lo’ng
 A hmangaih ang chhungah.

Kan lungngaih zawng zawng min hriatpui
Lawmin fakna hla kan sa zel ang
Aman min awmpui si
Lei hringnunah eng pawh lo thleng se
Ama hnen thlen zelin
Min hnehsak zel ang
A hmangaih ropui chuan.


*A hmangaih ang chhungah
Lawmna ka chhar ta
A hmangaih ang chhungah
Min hualhim thin
Van in mawi thlir chung zelin
Hringnun harsatna karah pawh
Ka vak bo l’ong
A hmangaih ang chhungah.


#Hnam tin, chitina mi zawng zawng
Amahah unau kan ni
Chatuan in nuam kan thlen hunin
Lawmin kan la inhmu ang a      
Hlimna famkim
Chatuan lawmna
Aw a hmangaihna fakin
Chatuana zual zel tur chu

*A hmangaih ang chhungah
Lawmna ka chhar ta
A hmangaih ang chhungah
Min hualhim thin
A rei tawh lo’ng lungngaih mangan
A hmangaih zawng zawng
Ama’n min hruai ang
A hmangaih ang chhungah.

A rei tawh lo’ng lungngaih mangan
A hmangaih zawng zawng
Ama’n min hruai ang
A hmangaih ang chhungah.

Sunday, December 12, 2010

Post 14: Sunday Pual - VIII

KA NUNNA LALPA

Ka nunna Lalpa
Ka sualna min silfai la
Eng dang ka duh lo
Nangin min siamthar ang che
I thiltihtheihna
I chakna ka ngai em e
Lei hmun khawharah hian
Hmuh ka nuam I ropuina
         
Ka nunna Lalpa ka ngai em che
I thutakin min hruai zel rawh
Lei pela I ram ka lo thlen nan
Chatuan nunna min neihtir rawh


Chhungril takna I duh si a
Nang hnaih hi ka tan a tha si
Ka nunna Lalpa I hnen ka rawn pan e
Nang chauh ka bel ang che
Hringnun sualna karah hianin
Ka khualzinna  kawng hrehawm ka zawhin
Ka chakna I ni
Min hruai zel ang che
Lalpa.

ECHO
Ka nunna Lalpa ka ngai em che
I thutakin min hruai rawh
Chatuan nunna min neihtir rawh

Sunday, December 5, 2010

Post 13: Sunday Pual - VII

SAM 103

Krismas a lo hnai ta a. Mitin maiin mahni hma zawn zawnah buaiin kan lo hmuak leh dawn a, Bazarah Traffic a jam leh ngei ang a. Motor tamtak an in tlar put ang a, a khat tawkin an tawlh che leh hrut thin ang; chunglam atanga en chuan Real-life-Zuma a ni leh ringawt dawn a ni.

Zuma hi ka khel peih vak lo a. Mahse heti zawng hian ka ngaihtuahnaah a lo lut a: Zuma kan khelh rawng inang mum pathum kan tlar chuan a ral zel a. Pathian hian a duh loh zawng kan tih 3-naah hian min ti boral zel tur ni ta se chuan mihring hi kan va hek dawn em!

Cowboy pa tak mai hian nupui a nei thar ve a, a sakawrah a phur a. A sakawr chu a inchhuih palh ta hlauh mai a, cowboy chuan engdang sawi lovin "Vawi 1" a ti thum bul ringawt a. A inchhuih palh leh a, "Vawi 2" a ti leh boh a. A sakawr vawi 3 a inchhuih chuan a puakruk a ri thawr a, sakawr chu a kap hlum ta der mai a. A nupui chuan "Engatinge a inchhuih palh vang mai maia i kahhlum rik ngawt?" a han ti dek dek a, cowboy chuan engdang maha chhang lo chuan "Vawi 1" a ti leh ringawt a...

Hetiang tak hian Pathian hi thinramin a kut rang ta se chuan mihringte hi chu kan van rethei dawn tak em...!
Mahse Sam 103-naa kan hmuh angin Pathian chuan kan khawlohna te min dahsawn sak a, vaivut maia siam kan ni tih A hriat avangin duat takin min dawm a ni.

Mihring dam chhung hi hlobet dam chen leka tehkhin a ni a. Phul pangpar chu a lo par a, rei loteah thliin a chhem a, a bo mai thin. Mihring hi chutiang lek chu kan ni a; Pathian erawh chu chatuan ata chatuan thlenga awm tur a ni.
Pain a fate a khawngaih ang hian,
LALPA chuan amah tihtute chu a khawngaih thin.
LALPA ngilneihna chu chatuan ata chatuan thlengin a awm ang.
LALPA chu fakin awm rawh se.

Sunday, November 28, 2010

Post 12: Sunday Pual - VI.

PATHIAN HMANGAIHNA
Pathian hmangaihna hi eng tiang chiaha thuk nge ni ang aw...!!!
Fanghmir rual hi hmuhnawm ti takin ka en fo thin a. Bu an nei a, chaw an zawng a. Rannung te deuh ruangte kan han pek hian buai takin an zawn ve laih laih a, an bu-ah an zawn lut thin. anmahni en rengtu kan awm ve a ni tih pawh an ngaihtuah lo a, an hre lo. Anmahni buai buaiin an buai a, duh duh huna hmet hlum mai theitu kan awm reng tih pawh an hre lo.
Sangha kan khawi a. Nitin chaw kan pe a, chaw kan pek chuan an rawn ei sap sap thin. Chaw pe lo ila chuan an ril a tam ang a an thi mai ang. Chuti chung chuan chaw petu chu tunge kan nih pawh an hre chuang lo a, midang nen eng kawng mahin min hre hrang lo. Keini chuan kan duat em em a, kan chawm a, an awmna tui lo nu deuh se tui tharin kan thlak a...
Mihringte hi Pathian hian min hmangaih em em a, mihringte erawh hi chu min hmangaihtu Pathian ngaihsak lo hian mahni buai buaiin kan buai fo thin. van atanga min lo en rengtu tan chuan fanghmir rual mahni buai buaia buai ho hi kan ang ngawtin ka ring. A chang chuan malsawmna tinreng min pea kan mamawh zawng zawng min petu hi kan hre hrang duh lo a, a thinlung tina turin sual kawng kan zawh lui thin a...
Pathianin a Fapa min pe a, a ringtu chu chhandamin an awm ang. Pathian hian a Fapa min pek rual hian ring duh lo eng emaw zat an awm dawn tho tih chu a hre tlang vek ang. Chhandamna kawng hi awlsam deuhin siam se; eng emaw taka sual bik an nih loh chuan Vanramah hian kal tir vek mai se tih te ka ngaihtuah thin; mahse, chu chu Pathian rilru a ni si lo. Hmangaihna a nasat poh leh chhanletna tura phut hi a lian thin. Fapa neihchhun pek chhanlet nana tih mai mai naran pawm theih zel chu thil tih theih a ni lo tlat a ni.
Hmangaihna vawrtawp chuan a chhanglettu theihna vawrtawp a phut tlat a ni...
 
Pathian hmangaihna ropuizia,
Thu leh hlain a hril seng lo;
Van aia sang, aw a zauzia,
Sual hmun thim ber pawh a thleng zo.
Sual bawiha tang, lungngai, mangang,
A Fapa a pe a;
Boral fate muanna a pe,
An sual a ngaidam ta.

Pathian hmangaihna hi eng tiang chiaha thuk nge ni ang aw...!!! A hmangaihna ka chhan let dan hi eng tiang chiaha thuk nge ni ang aw...!!!
 

Monday, November 22, 2010

Post 11: MCS Written Exam Result

MIZORAM PUBLIC SERVICE COMMISSION
New Secretariat Complex, Khatla
AIZAWL : MIZORAM

Subject :Written Results of Competitive Examinations for Recruitment to
the post of Junior Grade of Mizoram Civil Service
under Government of Mizoram, 2010

No. of vacant posts                                                           :   10
No. of candidates who appeared for the examinations: 815
No. of candidates who qualified for personal interview:  21


           The following candidates who appeared in the Written Competitive Examinations conducted by
Mizoram Public Service Commission for Recruitment to the post of Junior Grade of Mizoram Civil Service
under Government of Mizoram on 7th - 22nd July, 2010 are declared to have qualified for Viva Voce.

Their names are arranged IN ORDER OF ROLL NUMBERS only.


Sl. No.Roll No.Name & Father's NamePermanent AddressAddress for
Communication
16Abraham Beirazi Khithie
S/o K.Ngo-u
H/No. 153, Saiha Vengpui South
Near NT LEIPO Point, Saiha Dist.
Pin-796901
2173C.Lalnunsiami
D/o Lalsawmliana
H/No-295, Opp.Presby.Church,
Godfrey's Street, College Veng,
Aizawl.
3584Isaac C.Lalrempuia
S/o C.Lalsawmliana
H/No. 295, College Veng, Aizawl,
Near Presby. Church.
4918Lalfakzuala
S/o PC.Rosupuia
Chawngtlai,
P.O. Khawzawl Dist. Champhai.
H/No. B-15,
C/o.J.Laltanpuia, Venglai Aizawl.
51071Lalnunmawii
D/o Lalchhandama
H/No. C/37,
Chanmari 'W', Aizawl.
61139Lalremruata Kullai
S/o K.Lalmuana
H.No. A-60, Sihpui,
Ramthar veng, Aizawl - 796007
71164Lalrinawma
S/o Zochungnunga
H.No. K-34, Boihlora colony,
Venghlui, Aizawl.
81315Lalvenhima
S/o Lalvuana
Maubuang, Lungsai Veng.Vanlalsawma Tlau Building,
Maubawk kawn.
91373M.H James
S/o Buichhunga
New Colony,
Saiha
C/o M. Lalrammawia,
E-16,  Lalthuama Building,
Ramhlun Road, Chanmari
101378M.Misael
S/o Jeff. M. Sanga
New Saiha
Near Helipad,
Saiha
-do-
111415Malsawmzuala
S/o Lallungmuana
H/No. T-27,
Tuikhuahtlang, Aizawl.
121449Melody Ngurthantluangi
D/o S.Lianchhuma
H.No. V-115, ITI Veng,
Aizawl, Mizoram. 796005
131642R.Lalrinkima
S/o Lalchungnunga
H.No. L-96, Maubawk,
Aizawl, Mizoram.
141717Remlalliana Hnamte
S/o Lalvena Hnamte
H.No. Y-162, Ramhlun South,
Aizawl, Mizoram.
H.No. V-42,
Bawngkawn, Aizawl.
151931V.Lalruatliana
S/o V.Lalthlamuana
Hnahlan Champhai Dist.H/No.A-75/E,
C/o. V.Rothuama,
H.Laltawna building,
Electric Veng, Aizawl.
162018Vanlalrova
S/o R.Kapthanga (L)
Reiek, Vengthar,
Mamit District.
C/o R.Lungruala,
H.No YA-18, Chaltlang,
Tatkawng veng,
Aizawl, Mizoram.
172031Vanlaltanpuia
S/o T.C.Zadenga
N.E. Khawdungsei, Mual Veng, Champhai District.H/No. B/50,
C/o Lalthankunga Sailo,
H/S Veng, Khatla, Aizawl.
Below CS Bungalow.
182129Zoremthara Ralte
S/o R.Lalchungnunga
H/No. C-146, Venghlun,
Darlawn, Aizawl.
19C-33Lalhmingmuani
D/o B.S Kailiana
I.B Veng, Vengthlang,
Champhai . 
20C-42Lalruatsaka
S/o Biakthanga
Khawhai, Champhai Dist . C/o Lalremsiami
H.No 24/A,
Chawnpui Veng,
Aizawl
21L-57H.Lalrinpuia
S/o H.Lalhmangaiha
East Rotlang
Lunglei District
P.O. Hnahthial - 796571
C/o V.Lalzuithanga
Venghlui, H.No-V 83

Personal interview will be held on 15th & 16th December, 2010 at 10:00 AM
at the office chamber of the Chairperson, Mizoram Public Service Commission, Aizawl.
The candidates will be called individually.

Sunday, November 21, 2010

Post 10: Sunday Pual - V

THALAITE LEH SEX

Sex hi thalaite zingah hian thil tharlam tak pawh a ni tawh lo niin a lang a. Thenkhat  phei chuan engvakah mah an ngai tawh lo niin a lang. Nun intihhlimna chi khatah an ngai mai a ni. Hmana thil zahthlak taka kan ngaih leh sawi zahthlaka kan ngaih te pawh kha, kan khawvel changkanna in a keng tel emaw ni, zahthlakah pawh kan la tawh lo a, a tur ve rengah te kan ngai vek tawh a ni. Chutiang te kan nih tak nuaih avang chuan thalai te zingah sex hi a zalen hle a, hmun a chang thuk hle niin a lang.

Engvanginnge heti em ema sex hi Mizo thalaite nunah hian a hluar a, sawn pai, nau titla hi an tam tak em em? A chhan hriatthiam a har fu ang. A sawi uar deuhte phei chuan sawn pai nulh nulh te hi chuan an la hrat tawk lo a ni te an ti a. Hetianga sawn pai a, pai puitling te hi chu a  fel deuh te an ni an ti . A chhan chu naupai loh nan damdawi (indanna) an hmang nasa an ti. Tin, hmingchhiat loh nan damdawi inah  leh hmundangah te nau titla an tam thin a ni an ti. A van rapthlak tak em! Chutianga nau titla-ah chuan Kohhran zaipawl member, Sande Sikul zirtirtute pawh an awm hial niin an sawi. Nu thenkhat, Kohhrana inhmang tak, an fanute lo rai a, nau tihtlaktir te pawh an awm an ti.

Sex hi Mizo thalaite nunah hian a hluar na chhan ni theia lang chu, khawthlang nun (sap ho nundan) kan entawn vang pawh a ni thei. Internet atang te, T.V atang te, chanchinbu atang te in an chanchin, an nundan te kan hmu in kan hre thei a. An nun zalen tak mai te, an sum leh pai hman dan te, an hun an hman dan te hi kan lo hre ve a. Kan ngaihsan em em, Hollywood filmstar te leh milar dang te chanchin, an inngaihzawn dan te, an inneih dan te, an inthen hma leh dan te kan hria a, chutianga kan mi ngaihsan ber ten an tih chuan, an nun kan entawn avangin inngaihzawnna kawngah te kan lo entawn lo thei lo a. An nun hmandan chu a nawmhmel bik riauvin kan hre ta thin a ni. Thalaite hian hlim kan duh a, nun zalen kan duh a. Sex hi nun hlimna emaw kan ti a, kan hlim nan, kan zalen a ni tih lantir nan kan hmang ta thin a ni. Midang hi kan nunah lo inrawlh ve lo turin kan duh a, duh duh dana awm a, zalen taka nun hman chu kan duh thin a ni.

Tin, thalai nih lai hi taksa chak vanglai a ni a, tisa chakna pawh a nasa bik a, fimkhur a tul hun lai tak pawh a ni. Chutiang a nih avang chuan thil engkim hriat a chakawm a, tih chhin te chakawm thin a. Chu chakna chuan mipat hmeichhiat hman duhna sualah a hruailut thin a ni. Chu chu Pathian duh dan a ni lo va, Pathian huat zawng tak a ni. Hetiang a insum theih lohna a awm thin avang hian kan Pathian thu pawhin nupui pasal bik nei turin min ti a ni. Chutianga nupui pasal bik neia thianghlim tak a mipat hmeichhiatna hman chu sual a ni tawh lova. Pathian min siam dan tak pawh a ni a, leilung hi luah khata chi inthlahpung turin min duh a. Bible ah pawh, “Lalpa Pathian chuan Mihring amah chauhva awm hi tha a ti lova, a kawppui awm mi a siamsak a”, tih kan hmu a, chutiang anih avang chuan nupa ah insiamin nupui pasalah kan innei ta thin a ni. Chu chu Pathian duhdan pawh a ni .

Pathianin min siam dan hi mipa leh hmeichhia inhiptawn a, inti lawm tawn turin min siam a.  Chutiang tur pawh chu a ni reng a ni. Chutichuan mipa leh hmeichhia chu inhip tawnin kan lo induhtawn ta thin a; mahse, tunlaiah chuan mahni anpui (mipat pui / hmeichhiat pui) te kawp duh tlat an lo awm tam ta a, innei ta hial sawi tur pawh an awm tawh a ni. Hei pawh hi khawthlang nun kan entawn atanga thil tha lo tak mai kan chawkluh a ni ti ila a sual awm love. Hei hi Pathian min siam dan pawh a ni lova, sualna rapthlak tak a ni.  Hetianga   mahni anpui kawp ho hi an zak tawh lo hle mai lehnghal a, an inzep tawh lo hle a, a then phei chu an in chhuang zawk emaw tih mai tur a ni. Nula la naupang lam ah, college leh university  zirlaiah te, hmeltha leh piannalh tak tak mobile phone a koh mai theih te tam tak an awm an ti bawk. Heng ho hian pawisa tam tak tak an inchhiar a. an class pawh a sang hle. An pawnlam landanah chuan mi tha tak takte nen an hriathran loh a,   an kawp te pawh officer leh mi changkang chin bak an kawp ngai lo te an ti leh zel a ni.

Pathianin Sodom leh Gomora a hrem nachhan kha mipat hmeichhiatna an hman khawloh vang ni ber in a lang a. Heta tang pawh hian Pathianin a huat zia kan hre thei a ni. Kan Pathian thu-ah pawh inngaih ching te chuan Pathian ram an thlen loh tur thu kan hmu a ni. Pathian thu sawitu thenkhat te pawh hian an vei hle niin a lang a, an zinga pakhat phei chuan tunlai Aizawl nula ah hi chuan virgin an awm tawh lo a ti tawl mai a, hei hi chu a ti lutuk mah mah  pawh a ni mai thei. Mahse, mipat hmeichhiat hman khawlohna hian thalai te nunah hian hmun chu a khuar thuk hle tih chu a hriat theih a ni. Hetiang  renga kan kal hi chuan kan ram hian Pathian hremna chu kan la tawk ngei dawn niin a lang a, lo tawk ta lo teh reng pawh ni ila kan thih hunah chatuan hremna kan pumpelh dawn hauh lo a nia.

Tuesday, November 16, 2010

Post 9: Prisoner's Dilemma

He Game Theory hi kan hre ngai em aw? Han ngaihtuah chhin mai mai teh ang.

Police in misual rinhlelh pahnih (2) an man a. An thil tihsualah finfiahna (evidence) an neih chiah loh avangin a hranga dahin pakhat zawk thil tihsual te puang turin an thlem ve ve a. Result chi thum (3) a awm thei ta a:
1. Rinhlelh pakhat zawk hian a thianpa sualna a puan sak a a thianpain amah a puansak ve loh chuan amah chu a zalen ang a, a thianpa chu kum 20 a tang ang.
2. An inpuansak tawn ve ve chuan kum 10 ve ve an tang ang.
3. An inpuansak loh ve ve chuan thla 6 ve ve an tang ang a; a hnuah an zalen ang.

Suspect pahnih te chuan an thianpa-in a puang ang nge a puang lo ang tih te, anmahni-in an puang ang nge puang lo ang tih te ngaihtuah chungin duhthlanna harsa tak an siam fel a ngai ta a ni. Pakhat-in a lo puan ringawta a dangin a lo puan loh emaw, puan emaw khan....pakhat a lo inpuan loha a dang a lo inpuan si chuan...

Nang ni ta la, a lehlama i thianpa rilru tur hre miah si lovin, eng nge i thlan tak ang le?

Eng nge i Morality?

Mihring hian amah a inngaihlu ber fo thin a. Amah a inngaihhlutna leh thiltha nia a hriat um-a midang aia that leh hlawhtlin a tumna-ah hian midang thutlukna in danglamna nasa tak a lo thlen theih chiah hian kha midang lakah khan eng rilru nge a put thin? Mi chunga rilru tha pu si lovin kan chungah midangte tha viau turah kan ngai ngawt thiang dawn em ni?

Mahni thatna tur pawh ni se midangin an thatpui ve dawn chuan ti duh miah lo kan ni em? Kan thianpa pakhat Checker khel chuan ‘Ka tana move tha ai chuan midang tana kawng dalna tur ka zawng’ a ti fiamthu thin a. A taka kan nun-ah hian a chunga Susupect pahnih te dinhmunah hian indah ta ila eng nge kan sawi chhuah ang? Chutiang thil chu kan nunah hian kan tawng fo a nia!

Sunday, November 14, 2010

Post 8: Sunday Pual - IV

He hla hi SHILLONG PASTOR BIAL KTP SILVER JUBILEE (1978–2003) puala HLA INPHUAH SIAK atana ni 22/06/2003-a ka phuah ve a ni a.
Vanneihthlak takin 1ST PRIZE ka dawng ve hlauh a ni.



KA CHHANDAMTU CHU
                                    ( Joba 19: 24-27,  I Korinth 2: 9,10 )


Mita hmuh ngai loh, benga hriat ngai loh,
Hringmi nun chhungril hriat phak loh;
Hringfa chhandamna, hringnun famkimna,
Pathian hmangaihna  hi a ni.

            Ka tlantu chu A nung tih ka hria,
Halleluiah ! Ka fak ang.
He lei ram hi ka pelh hunah chuan,
Ka la hmu ang, ka Chhandamtu chu;
A hnenah ka chawl tawh ang.

Thimna leh thihna daihlim ramah hian,
Sual ral lo hrang thin mah se la;
Eng ropui kan hmu, Hnehtu Lal Isua,
Pathian Fa nihna min pe a.

I rorel makzia tunge hril zo thei ?
Hlimthla iangin kan ral si thin;
Nang erawh Alpha, Omega I ni,
Chatuana ropui zual zel chu.


Engkimtitheia, Emmanuela,
Pathian kan hnenah A lo awm;
Mi thianghlim famkim, khawvel sual phurtu,
Pathian Beram no chu A ni.

Friday, November 12, 2010

Post 7: Mizopa Lei Thang (Tongue Twisters)

Heng te hi Mizo Tawnga tongue-twister kan dah mai theih te a ni a, rang deuh deuhin vawi 5 vel han chhiar nawn zawt zawt chhin teh. A dang hria chuan rawn thawh belh teh u:

1. Tlang panga thing ding ro khi thli chhe chhem thluk nge thli tha chhem thluk?

2. Luiah ka nu ka hmuak, ka khup ka nawt.

Saturday, November 6, 2010

Post 6: Sunday Pual - III

BIBLE – A THU INKALH NIA LANG TE

Mi thenkhat chuan Bible-ah hian thu inkalh a awm an ti a. Ziah te pawh an ziak chhuak a. A hnuaia tarlan te hi han chhiar chhin ila eng nge kan ngaihdan le?
1.         Tu in nge Davida kha Israel mite chhiar turin ti ?
(a) Pathian        (II Sam 24:1)
(b) Setana        (I Chronicles 21:1)

2.         Hemi(kha) chhiarpuia Israel rama mi huaisen/khandaih kengmi awm zat?
            (a) Nuaih riat (II Sam 24:9)
            (b) Maktaduai khat leh nuaih khat(I Chro 21:5)

3.         Judai ramah khan mi huaisen/khandaih keng mi engzat nge hmuh an nih ?
            (a) Nuaih nga (II Sam 24:9)
            (b) Nuaih li leh singsarih (I Chro 21:5)

4.         Lalpa zawlnei-ina Davida hnena tam kum lo thlen chin tur duh a thlantir zat chu?
            (a) Kum sarih (II Sam 24:13)
            (b) Kum thum ( I Chro 21:12)

5.         Ro a rel tan tirh lai khan (Jerusalem-ah) Ahazia kha kum eng zat nge ?
            (a) 22 ( II Lalte 8:26)
            (b) 42 ( II Chro 22:2)

6.         Jehoiakima kha a lal tantirh (Jerusalem-ah) khan kum eng zat nge a nih?
            (a) 18 (II Lalte 24:8)
            (b) 8   (II Chro 36:9)

7.         Jehoiakima khan eng tia rei nge Jerusalemah ro a rel?
            (a) Thla thum (II Lalte 24:8)
            (b) Thla thum leh ni sawm (II Chro 36:9)

Wednesday, November 3, 2010

Post 5: 1st AMC General Election

VOTE KA THLAK

Vawiin nileng khan Aizawl Municipal Council hmasa ber tur inthlanna chu tluang taka kalpui a ni a. Vote tla zat leh tunge tling dawn tih lam chu ka hre hauh lo a, INTHLAN chungchang hi tlem han sawi zawk teh ang.

Vote thlak hi Democracy ramah chuan mipui chanvo pawimawh tak mai a ni a; a pawimawhzia ngaihtuah lem lo tan chuan ho tak, peihawm lo tak anga ngaih theih a ni. Khawvela Democracy ram lian ber India-ah hian MP leh MLA inthlan ah te pawh vote tla percentage hi chuti lutukin a tha ngai vak lo a. Chuti a nih chuan democracy dana inthlan hian a tling te hian mipui an represent tak meuh em tih hi zawhna awm thei pawimawh tak a ni.

Entirna han siam ila -- Inthlanna-ah candidate 5 lo awm ta se; 50% aia tlem vote tla se, vote hmu sang ber pawhin khalai biala mipui majority kha a represent zo lo tihna a ni ang. Vote lo tla kim vek pawh ni se, a hmu sang berin 40%, a dangte’n 30%, 20%, 5% leh 5% lo hmu ta se: A hmu sang ber chu tlinga puan a ni ang a; mahse a nihna takah chuan amah duh tu 40% leh duh lotu 60% an awm tihna a ni ang. Heti lekah pawh lo lang chiang ta chu Indian multi-party system democracy hian mipui ai a awh zo lo ve thei a, a famkim bik lo a ni tih hi han hre ve mai mai ta ila.

Chutih rual chuan Democracy hi khawvela political system tha berah ngaih a ni tho a. Famkim lohna nei mah se thatna a ngah ber ni tur a ni. AMC inthlan-ah pawh hian result a lo chhuah hunah chuan mipuiin kan beisei ang a ni lo mai thei. Tuna Mizorama party hrang hrangten MLA kan neih dan nen pawh a inkhuangrual lo mai thei a. Thlang tlingtu zat hi chu engzat pawh ni se - vote 1 a tling emaw, vote maktaduai-a tling emaw pawh ni se - thlan tlina ber hian a tlinna bial mipui zawng zawng ai a awh a ni tih a inhriat phawt hi a pawimawh a ni. Min thlang lotu chu ka ngai pawimawh lo ang kan ti a nih chuan ram hmelma leh hruaitu ni tlak lo kan ni tihna a ni ang.

Aizawl-ah Municipal Council kan lo nei dawn ta a. Mizoram-in a la pal ngai loh kawng a zawh dawn a ni a. Councillor thlan chhuah ten taima leh dik taka ro an rel chuan AMC hmasa ber hi hmahruaitu entawn tlakah an siam ang a, a bul a fuh chuan a hnu zel pawh a tluang ngei ang. 'A bul tan that chu a chanve zo ang' tih a nih kha!

******************************************************************
TRIBUTE TO BUONGLIENKUNG


Vawiin hi hla phuah thiam Buonglienkung thih cham a lo ni reng bawk a. Amah hi mimal tak pawn ka ui em em a. Ani hi hlaphuahtu ka ngaihsan te zingah a tel a; a chhan chu a hla te hi Pathian pek, ama nun atanga a phuah an nih thin avangin an hlu ka ti a, a hla thu te a mar nalhin a thluk nen a inhmeh thei em em bawk.

Khawvelah hian hla hi chhiar sen loh an phuah tawhin ka ring a, an la phuah leh zel dawn bawk. Pathian hla, phuah ve tum hrim hrim vanga phuah chawp ve mai tih hriat lutuk hi chuan rilru-ah eng hna mah a thawk thei lo niin ka lo hmu ve a (Lenglawng leh Lengzem hla chu lo hrethiam ta rih ila). Hla phuahtu-in ama nuna a tawn, Pathian a pawl tak takna atanga lo chhuak hla reng reng chu hna thawk lovin a awm ngai lo.

Pathian mi Buonglienkung hi a khawvel tan a uiawm em em; a thlarau chu hlim tawp lovin Chhandamtu kiangah a leng kumkhua tawh dawn a ni.

Saturday, October 30, 2010

Post 4: Sunday Pual - II

THALAI HMANTLAK

Kristian Thalai-te hi kan thupui atang reng pawh hian chak leh hmantlak ni tur chu kan lo ni. Rawngbawl tura chhandam kan ni a, thiltha ti atana siam kan ni bawk; chu lo rengah pawh mihring vanglai, a chak ber lai chu thatlai hun a lo ni ve reng bawk si. Thalai nih hrim hrim hi a ropui a, a hlu a, a danglam a ni. Mihring nun hi then thuma then chuan Naupang, Thalai leh Upa  tiin an then thin. Thalai nih hun hi hun nuam ber, Naupangten an chak leh an nghahhlelh em em, Upaten an ngaihban theih loh hun chu a ni.

Chutihrualin, hun leh tuilianin tumah a nghak lo va, thalaite pawh min nghak hek lo. Hun a ral a, ni a liam a, kum a vei zung zung bawk. Hnah hlui an til a, hnah thar a lo chawrno thin ang hian rual u te an liam zel a, thangthar an lo chhuak zel bawk a. Kan duh emaw duh lo emaw naktuk hi chu vawiina thalaite kutah hian hlanin a awm ngei ngei dawn a ni. Chuvangin vawiina thalaite hian naktuka kan khawvel chhiat leh thatah mawhphurhna kan nei lian em em a ni. Chutiang hun chu lo thleng ta sela, vawiina thalaite hi hmantlak, rintlak, innghahna tlak kan ni em tih kan inenfiah a tul hle mai. Midangte tan emaw, ram tan emaw, Pathian tan pawh ni se, Thalaite hi hmantlak kan nih ngei ngei a tul a; a bata kan bat, kan mawh liau liau  a ni.

Monday, October 25, 2010

Post 3: Asanga..Kullai Jr..

Lalruatsanga (Asanga) is the cutest baby born on 9th Sept, 2010...Here are some of his photos..

Aaanuuu..tete a tuh eeeeeeee.....





Taking bath daily...

Sunday, October 24, 2010

Post 2: Sunday Pual...

PATHIAN THU

Jona chungchang hi han ngaihtuah chiang ila, khatiang khawpa lian, mihring dawlh thei hial, sangha a awm thei dawn em ni tih hi Pathian thu zirtute zingah pawh zawhna lian tak a ni a; French Revolution hun lai thleng kha chuan hetiang khawpa sangha lian hi a awm thei lovang tih thin a ni. Nimahsela, mithiamte’n an han zir chian zel hian a lo theih ( a lo dik ) reng mai niin a lang. Hun engemaw liam taah khan lawng pakhat Star of The East chu tuipuiah an zin chhuak a, whale lian tak mai pakhat an hmu fuh hlauh mai a, an kap ta a. Chutih lai chuan an zinga mi pakhat James Bartley chu tuiah chuan a tla palh ta hlauh mai a, an hmu zui ta miah lo leh nghal a. An zawn beidawn hnu chuan an sangha kah hlum chu tui chunglangah a rawn lang ta ruau mai a. Lawngpute chuan an han hnuk chhuak a, a dul an han zai hawn chuan an thianpa tuia tla chu a lo awm reng mai a. Nikhaw hre lo leh sangha puma acid thurin a chiah avanga vun var vekin a lo awm a. Amaherawhchu tuite an han leih hnu chuan a lo harh chhuak veleh ta a ni.
Mithiamte’n an zir chinah hian whale hi chi hrang sawmpali (14) vel a awm a ni an ti a. Amaherawhchu Whale zawng zawng hian thil lian tham an dawlh thei vek lova. Chung zinga chi khat Cachalot Whale an tih mai chu mihring mai nilova Shark lian tak takte pawh dawlh thei hial a ni a. A pumah hian boruak bawm tamtak a nei a, mihring pawh dawlh se a pumah hian reitak chu an dam thei dawn niin an hria a ni. Tin, a thil ei hi a luak chhuak leh fo bawk. Hetiang whale hi Mediterranean tuipuiah chauh a awm an ti leh nghal a, Jona dawlhtu kha hetiang sangha hi ni thei mai awma rin a ni. Jona lem tur hian LALPA’n sangha lian tak a lo ruat a ni si a (Jona 1:17)
Sangha chuan Jona chu a law chhuak ta a, Ninevi khawpuiah chuan Jona chuan thu a hril ta a. He Ninevi khawpui hi lian tak mai a ni a, ni thum kal laia zau a ni. Ninevi khawpui hlui an laihchhuah khan a zau zawng hi 60 km vel nia hriat a ni a. chu chu nithum kal vel a ni an ti.
Thuthlung Hlui leh Thuthlung Thar te hi Pathian thu a ni a; Pathian ringtu te chuan kan innghahna berah kan hmang tur a ni. Pathian thu hi a daw ngai lova, Bible-a kan hmuh tamtak awih awm lova lang leh mihring ngaihtuahna-in a tihtheih bak thilmak tamtakte pawh hi Pathian thu vek an nih avangin a takin a lo thleng ngei a ni tih hi kan rinna tinghettu pawimawh tak a ni.

Wednesday, June 23, 2010

Post 1

My first post is for Asanga Nu. Here's her fav poem written by e e cummings. I haven't much to say about this poem but that i memorize it because of her...


i carry your heart

i carry your heart with me(i carry it in my heart)
i am never without it(anywhere i go you go, my dear;
and whatever is done by only me is your doing,my darling)

i fear no fate(for you are my fate,my sweet)
i want no world (for beautiful you are my world, my true)
and it's you are whatever a moon has always meant
and whatever a sun will always sing is you
here is the deepest secret nobody knows
(here is the root of the root and the bud of the bud
and the sky of the sky of a tree called life;
which grows higher than soul can hope or mind can hide)
and this is the wonder that's keeping the stars apart
i carry your heart(i carry it in my heart)