Post 24: Mizoram Basketball tan...

MBBA hi a bul atangin draft tha leh ta ila. Tuna affiliation awmsa hi ringin nakkum 2012-2013 season atan hetiang hian in ruahman chhin teh ang.

1.       Division tina club awmte hian an dinhmun pangngai chhawmin 1st div hian draft value 5000 points nei se, 2nd div in 3000, 3rd div in 2000 nei se.

2.       Player tinin value points nei theuh se. Hetiangin:

·         Mizoram aiawha senior levela kal tawh leh NIS chhuak coach kan neihte value 500 points

·         Junior leh a danga Mizoram aiawha kal te value hi 350 point

·         1st div player dangte 300 points

·         2nd div player te value 200 points

·         3rd div player te value 100 points

3.       Tichuan, 1st div leh 2nd div bik atan hian player tin te value list siamin MBBA Draft hun atan engtik chhun emaw, zan emaw ruat ni se. Chu hunah chuan heng div-a club te hian player duh turn indawt zelin thlang se. 3rd div bik chu tuna an roster neih ang ang hi pawm sak nghal mai ni se la.

4.       Club tinten an player duh an thlanin player value belhkhawmin club value a pel tur a ni lo. Club ten an draft value a pelh loh phawt chuan player thlang tura chance an neih zelah an duh duh an thlang thei ang.

5.       Hei hian division khat rau raua club te inthlau lutuk tur a veng ang a, league pawh a tihmuhnawm zual ang.

6.       Draft hi zawh a nih hunah club ten an value chhunga an khung leng thei a nih phawt chuan club dang nena inbe remin khawi division ami pawh player an trade thei ang. Tin, club  value point in a la daih chuan division dang ami pawh player an la lut thei ang. (club 2 te an inrem phawt chuan)

7.       A tira an value bakah hian club leh player  ten an khelh dan a zirin value an hmuh belh (earn) emaw, hloh (lost) emaw thei ang. Hetiangin:

a.       1^st div Club tan:

                                                               i.      1^st div club hneh/hneh loh = +30 points/-20 points

                                                             ii.      2^nd div club hneh / hneh loh = + 20 points / - 30 points

                                                            iii.      3^rd div club hneh / hneh loh = + 10 points / -40 points

b.      2^nd div Club tan:

                                                               i.      1^st div club hneh/hneh loh = +40 points/-10 points

                                                             ii.      2^nd div club hneh / hneh loh = + 30 points / - 20 points

                                                            iii.      3^rd div club hneh / hneh loh = + 20 points / -30 points

c.       3^rd div Club tan:

                                                               i.      1^st div club hneh/hneh loh = +50 points/-0 points

                                                             ii.      2^nd div club hneh / hneh loh = + 40 points / - 10 points

                                                            iii.      3^rd div club hneh / hneh loh = + 30 points / -20 points

8.       PLAYER TAN:

a.       Player chu season tluana a khelh dan record atangin teh  a ni ang a. Points score, rebounds, blocks zat list siam a ni ang a. Henga leader  theuhten 20 points an hmuh belh ang a. top 20 chin ten 15 points hmuh belhin a bak top 50 ten 10 points. A bak top 100 chin ten 5 points an hmuh belh ang.

b.      Hemi atan hian division wise a siam hran lovin a pumpui atan list 1 hman a ni ang.

c.       Player, season 1-a game 5 khel tling lo te chuan 10 points an lost ang.

9.       Club tinin draft value points an neih hi season khat chhungin a tlem lamah 10% bakin tlakhniam awih loh ni se. Chu aia tam chuan an lo tlakhniam chuan an point siamrem turin an player thenkhat compulsory in an release tur a ni. Club value adjust-na atan hian MBBA in season 1 chhungin vawi 2 transfer hun – mid season leh season ending-ah a siam ang. Heng player release te hi khawi club pawna lakluhna daih value points reserve an neih chuan an la lut thei ang.

10.   Club ten a tam zawnga point an hmuhbelh chuan a tam lam limit atan an original value atanga 50% thleng an hmuh belh thei ang a, a bakah chuan hmuh belh mahse an club value ah belh a ni tawh lovang. An point hmuh belh ang zelin player thar lakluhnan reserve point an neihte transfer season chhungin an hmang thei ang.

11.   Hemi atan hian MBBA in club leh player value update quarterly in a ti chhuak thin ang.

12.   MBBA season kalpui dan chu a ngai ang tho hi a ni ang a. tournament a tel lo club an awm chuan an value 100 points an lost ang.

13.   Season tawp hnua division thara kaisang ten bonus point 500 an dawng ang a. div hnuai zawka tlahniam ten 500 points an hloh ang.

14.   Club tin ten player transfer hun hawn laia player lei, trade etc atan pawisa an hmang a nih chuan an thu thu a ni ang a, mahse an value points hi an pel hauh tur a ni lo.

15.   Club tin roster ah player 13 tal an awm tling ngei tur a ni. Hei hian division tina club te player an draft danah duh ang anga ti pawp pawp thei lo turin a veng ang.

16.   3^rd div club, hneh nei lova point hloh char char an awm thei a. Player tam tak neia an value exceed tur an awm thei bawk. Chutiang club ho chuan din chhunzawm zel an duh chuan MBBATechnical Committee in tha a tih angin player value a tihhniam/chawhrual sak ang.

17.   Season tawpah player te club-in an chhuahtir a nih loh chuan Free Agent an ni tawh lo ang. Chutih rualin club value in a phaka, an khelh mekna club-in a phal bawk chuan club dangah an insawn thei ang.

18.   1^st leh 2^nd div club in player thar hlak, (in affiliate vawi 1-na) an lakluh dawn chuan an point earn atangin lei se. 1^st div player 1 lei nan free extra point an neih sa 300 sacrifice se, 2^nd div chuan 200 pts. Hetiang point chuangliam (extra) an neih loh chuan player thar la thei lo se. Chung player tharte erawh chuan an luhna division-a player te general point nei ve nghal se. (no. 2 a tarlan ang khian).

19.   NBA te angin kumtin Draft kan tih theih hmel loh a. Player thar kumtin an awm zel a, heng hi 3^rd div a khel tur chu pawm mai ni se. Player Value 0 (zero) atanga tanin.

POST 23: ZINNA CHANCHIN THENKHAT...PART - I

Naupan lai hi chuan motor hi kan rui nasa ve thin khawp mai a. MST Bus pawl, tukverh tluana thir mum invuah phei ang chi te hi chu hmuh ringawt pawha lu tina bur mai, zin chuan ruih ngei ngeina - ruihtheih thil-ah kan ngai tawp kha a nia. Thingtlang bus tamtak phei chu ro bum mai, tukverh darthlalang pawh thing vek, kharphui tur chuan chawi kan ngai chi kha a nia. Motor ruih hi chu ngei ngei turah kan dah ve tawp mai a. Luak tak chu ka luak ngai lo nain ka lu a na thei hle!

1999-ah B. Sc seat zawng turin Shillong-ah kan chhuk risk ve tawp mai a. Capital Night Bus sei pui maiah kan chuang a, Durtlang khamah kan tlan chho a. Kawngthlang lama footpath te hi la awm hek lo, motor intawh changa an back hrut mai hi chuan thlang lama khamah ngaihtuahna hi a leng thla chum chum zel a. Vawi 1 ka hmuh chian ve tak mai chu a ke hnung chung zawnah ka thu a, a ke hnung khan lei rap lovin kham pang boruakah an vir zuai mai a nih kha!

Chumi tum chuan motor ruiin ka luak ve a! A hnuah chuan ka luak leh ngai tawh lo. Vawi khat erawh chu Kolasib ah serthlum ka lei a, ka ei vel pap pap a. Kan tlan leh chu Bilkhawthlir thlen hmain pum lamin a rawn pump ta ut ut mai a. Tihngaihna hre tawh hek lo, risk tak meuhin panhnah ka ei chiam a. ka ngeih ta phian a. Chuta tang chuan motor ka ruih dawn apiangin panhnah ka hmawm hmak zel a, ka zin apiangin kuhva hring ka pai ta ziah..a panhnah ka duh vangin.

A tlangpuiin zinnaah hian ka meng thei vak lo a. Ka mu nasa thei lutuk hi ka nghawng te a kham urh thin zawk a. Shillong pan turin Thuampui atanga kan chhuak hi Bawngkawn Traffic Point thlen phei hmaa muthilh hman pawh ka nei fo. Vawi khat erawh chu tihtakzetin kawng hi hmu kim ve reng reng teh ang ka ti a, Shillong atangin Sumo-in kan haw a, ka meng tluan ve parh!

M.Sc kan zir laiin NEHU hostel-a kan awmpui VLK-a ui lak, a hawn peih loh hi ka hawn a. Kawngah ka pawm chho ran mai a. Kan tluang lo hle mai a, Meghalaya pelh dawn tepah hian kan chuanna Sumo chuan Truck a la su zui a. Radiator a chhia a, mahse muang changin a tlan thei a, a khat tawkin tui an thun chho deuh reng a. A thlakna an chah a, a lo thlen hma lo nghah tawp ai chuan muang chang talin tlan zel teh ang kan ti a. Motor a lo thlen chuan zan tir hi a ni tawh a, ramhnuaiah bungrua kan hlang sawn a, kan chuanna kan thlak a. Kan buai lai chuan ka uite chu a lo vak kual vel a, kan kal leh dawnah chuan ka hmu ta hauh lo mai a. Chhun chu ni se ka hmuh mai chu ka ring a; a thim sia ka hmu mai si lova, tihngaihna dang awm hek lo le, kan tlansan ta mai a. Kha ui kha a la dam ang em aw ka ti thin. Ui hi kum 15 te an dam theih chuan a dam chhung chanve chauh a la hmang dawn a nia!

Kan thianpa pakhat ui hawn ai chuan ka la vannei zawk thoin ka hria. Ani chuan Delhi atangin Dalmatian a hawn a. Delhi-ah amah pawhin a in phak loh bawnghnute in a chawm a. Rel-ah ticket a lak kep loh avangin inthiarna-ah te a bihruk pui zak zak a. An khuaah miin an lo talh ruk sak a...chempui nen an zawng thuak thuak mai a ni awm e...! :)

Mizorama rawn haw hian nuam vawi nga (5) kan tawng thinin ka hria. 1-naah chuan rawn haw kan tum a, ticket kan lak hi a ni a. Hun rei tak ata kan lo nghahhlelh, a taka kan haw dawn ta chu rilru hi a nuam veng veng thin. Nuam lo duh erawh chu mi haw tur thlah, mahni la haw ve theih si loh hi a ni a. Dhankheti velah thiante haw tur kan han vai liam a, an kal nul nul a, keini kan haw beuh beuh a, a fair lo tlat thin.

2-na chu haw dawn tak tak, motor a’n che ta tual tual hi a ni a. Motor seat-ah nuam thei ang berin kan han thu pil a, ear phone kan han vuah ngei a, Mizo hla kan han ngaithla ngei mai a. Kan nui var var tawh mai thin a ni. Mahse lo zawm ve a, zai pui chu a mualphothlak duh khawp mai. Kan music ngaithla ring a ta langin aw ri chhuak kan hre chiang thei tawh thin si lo a, ngaithlatu tan a lo mawi lo ve thin khawp a ni tih ka chuanpui tawh nulate min hmuh apianga an nuihdanah khan ka hre mai..:)

Nuam 3-na chu Mizoram ram ri thlen a "WELCOME TO MIZORAM" tih lo intar han hmuh hi a ni a. Phai boruak lum tlan pelin zo thlifim a lo thaw bawk nen rilru a nuam huai huai thin. Mahse Excise check gate-a chhuk ngai ziah erawh a ninawm duh khawp mai..zing khawvar hma, mut nawm lai takin kan thleng thin bawk sia..!

Nuam 4-na chu Durtlang Leitan pelha Aizawl lo lang pe uar hi a ni a. A dik tak chuan Mizoram hi mawiin nuam viau mah se a kawng erawh hi chuan thla a ti muang fahran lova. Tlanliam te, insut te etc a hlauhawm tlat a. Durtlang Leitan pelh hi chuan chetsualna zawng zawng pumpelhin kan khua kan thleng dawn ta e tiin rilru a thlamuang tel tlat thin a.

Nuam 5-na leh a nuam ber chu mahni in ngei han thlen hi a ni a. Chhungte hmel hlim kan han hmuh hi chuan zin kawnga kan hahna a reh huai huai a, kan thil hawn chhe te te kan han phawrh a, hlimin kan nui tlang thin. Hausa lovin hmeltha lo mah ila, mahni chhungkua ngei hi mihring tan chuan a lo nuam ber a. In ropui tak tak karah mahni in tlawm tak, duh duha kan awm ngamna hi a lo hlu ber a ni. Chuvang chu a ni ngei ang ni 3 ni 4 vel lek kan chawlh pawhin haw kan tum ut ut thin...!

Post 22: LAWNGTLAI KHUAAH LUNGTE PAKHATIN SAVA PAHNIH, NI LO, PATHUM ZAWK...!

Mizo novel chhiar thin emaw, Mizo tawng lehkhabu ngaina emaw chuan nikum 2010-a Book of the Year “Beiseina Mittui” kha in chhiar tawh ngeiin a rinawm a. Kha lehkhabu chhah zet mai ngaihnawm taka ziaktu kha hmanni ni 10 Oct, 2011 khan ka hmu ve ta chiah mai. Sava 1 chu...

A hun leh a hmun chu Circuit House, Lawngtlai-a Lawngtlai Academy of Letters (LAL)-in Rising Day an hmannaah a ni a. Pu Samson-a hi LADC-a hnathawk mek a ni. He seminar-ah hian Lawngtlai DC Pu B. Lalhmingthanga zuiin ka kal a. Ka be lo na a, amah ka hmu hrim hrim hi ka lawm khawp mai. A lehkhabu tihchhuah leh tur pawh a nghahhlelhawm tawh khawp mai!

He function ah hian LAL hian Dr. Robert Tintlunga Hnialum hnenah LAL Award 2011 an hlan a. Pu RT Hnialum hi pa taima tak mai, lehkhabu rotling tam tak lo ziak tawh a ni a. Tunah hian press-a dah mek 3 vel neiin ziah leh pawh a la tum hle a. Laptop a mamawh thu a la sawi chher chher...kum 82-na hmang mek chungin! Sava 2-na chu....


Sava 3-na chu Paul Kullai a ni a. Ani hi chuan a chunga mite ang khian literature lamah sulhnu a nei lem lo. Kolasib khua, Lawngtlaia sikula thawka awm ta a ni a. St. Anthony’s College, Shillong-a kan luh laia Stephen Hall-a kan senior a ni a. Aizawlah a awm reng amaw tih laia he lama kan lo inhmu thut chu mumang te pawh a ang deuh hlek mai.


He seminar-ah hian “Chhiatni-a kan insawngbawl dan” Pu Lalhleia buatsaih paper ngaihthlak a ni a. Sawi honaah din ve ka chak viau na a, ka la mikhual deuh a, tihtur dang ka neih avangin ka hmanhmawh bawk nen ka sawi ve ta lo.

He seminar paper buatsaihtuin a tarlan tha deuh nia ka hriat chu THLANPUI siam te, Khawhar ina KHUANG PAKHAT HMAN te, puan leh pangpar aia PAWISA fai pek mai te hi a ni a. Chutih rualin ngaihdan phir ka neih chu - Pangpar inpek loh kan sawi mawi viau rual hian Khawtlang leh midangte tana inpe te mi tamtakin an thih niah pangpar hlana chawimawi an duh hi a pawi lem em ni aw? An phu ve reng a ni lo’m ni ka ti deuh.

He paper-a tel lo ka rilrua awm chu ---- Khawpui damdawi inah hian thingtlang mite pawh kan in admit fo a. Vanduai taka mihring chang zo ta lova haw chang pawh a tam. Mizo tlawmngaihna leh tih danah khawpui chhunga tute emaw, chhungkhat laina tha inah ruang chawlhpuia phurh chhuah a ni tlangpui a. Hei hian tul lovah mi tamtak a tibuai a ni lo’m ni ka ti deuh a. an chhungkhat laina te chu an buai ngei ang. An buai hun tur pawh a ni a. Mahse ruang chawlhna khawtlang hruaituten an buaipui lo thei si lova, an hna tamtak an thulh phah thin a ni. Chuvangin, Damdawi in bul hnaiah te hian RUANG CHAWLH LAWKNA tupawhin an hman theih tur hi awm ta se, (Damdawi in te hian nei ta mai se) a that ka ring a. Duh leh thingpui lumsaktu tur leh enkawltu rawih ni se. Khaw pawna ruang chhuak tur a awm pawhin an chhungte an lo kal khawm ang a, chu hmun atang chuan an khua an pan mai ang chu...

ASANGA Pawh Bible Society of India Life Member a ni ta e...

Asanga leh Ngenngawli (kan zawhte) te pawh nu ber RPi hovin BSI-ah Life Member an ni ve ta a. Ni 10.7.2011 Pathian ni zan inkhawmah Life Membership Certificate an dawng a ni.

"Pathian rinnaah chuan boruakah rah tur awm lovah ke pen luih a ngai thin a. Chutianga kan pen chuan kan tla ngei bawk thin; mahse, Pathian chuan lei kan thlena kan insawhnat hma ngeiin min lo dawm leh hman ziah thin a ni. Ringtute hian a him china kan awma rinnaa boruaka ke kan pen loh chuan Pathianah rinna kan nghat thei lo"

Hei hian RINNA chu a sawifiah chiang riauin ka hria. Hei hi zanina BSI campaign-a lo kal Rev. K. Lalhmingliana sawi a ni a. He lai thu tak hi Shillong-a ka awm lai khan Shillong Bial Pastor-a lakluh a nihin a sawi a. Ka la hre reng mai.

Post 20: Asanga Pics

Asanga leh Jeremia (s/o Laithangpuia)

Asanga (mawza sen bun) hian naktukah hian thla 7 a tling tawh dawn.

Post 19: My Egg Drawings

Post 18: KAN VENG TI HMINGTHATU

Kan veng hian Sorkar laipuiah Member of Parliament kan nei a, Mizoram Sorkar-ah Minister kan nei a. Gazetted Officer kan nei nual a, Primary School atanga College thlengin zirna in kan kawl a, Mizoram mai ni lo India rampum huapa zirtirtu tha chawimawina dawng thei khawpa zirtirtu tha kan nei bawk. Mizoram puma lar tham zai thiam leh infiammi kan nei a, Kohhran lamah pawh Mizoram puma mahni Kohhran bikah chuan pawimawh ve tak tak kan nei nual bawk.

Mi pakhatin thil tha a lo tih emaw, hmingthanna tham engemaw a lo tih emaw, hlawhtlinna a lo chan emaw hian veng hming ti thatu kan ti thin a. Chutih rualin a lehlamah rukru emaw, ruihtheih thil mansak emaw an awmin veng hming a ti chhia kan ti thin bawk. He thu hi a dikna a awm rual rualin ngun lehzuala ngaihtuah chuan hei hi veng hming tithatu leh tichhetu a ni tak tak em aw a tih theih.

A nihna takah chuan, a hmasa bera kan sawi ang mi khi veng tin hian sawi tur ting chuan an lo kawl ve nual thin mai (kawl ve lo veng pawh an tam tho a). Chief Minister awmna veng nih hi veng tihmingthatu ni ta se engtikah mah CM kawl ve lo tur veng hi a tam zawk kan ni ang a; kan veng ngei pawh hian chutiang hmingthatna chu kan la chang ve lo va, kan chan hun tur pawh a hriat chuang lo a. MP nei ve lo tur veng pawh Mizoramah hian a tam mai! Chutihrualin a chunga mite ang khi kan duh lo tihna a ni lo va; a tam thei ang ber kan vengah mi lar leh pawimawh awm se chu kan duhthusam phei chu a ni.

Chuti a nih chuan veng hmingthatna atana pawimawh zawk thil awmin a lang tlat. Rukru pakhat avang ngawtin tu veng mah kan en hnuai ngawt ngai lem lova; mi pakhat lek vangin a veng pum kan hmu sang emaw, hmu hniam emaw ngai lem lo a ni lo’m ni? Kan veng mi pakhat hi ruihhlo man sak ta se, kha mi pakhat vang khan ‘Ramthar Veng chu ruihhlo zuar veng an ni’ tiin tumahin an sawi lovang. Chutiang tho chuan tlangval pakhat fel em em vang ngawtin kan veng pum hi min hmu fel vek chuang lo vang!

Kan venga khawhar ina lo kala thusawitu pa pakhat chuan, "Ramthar Veng chu in zaithiam hle mai, in tangrual si", a ti a. "Ramthar Venga mipui te intawiawmna a thatzia ka hmuh hian Ramthar Veng hi lu nghahna’n ka duh ber mai", tia sawi pawh an awm nual tawh. Kei chuan hei ngei hi - veng chhung mipui kan inlungrualna leh kan intawiawm tlan thatna hi - kan veng ti hmingthatu-ah ka ngai.

Puipun nikhua chhiatni leh thatni-ah te, khawtlanga thiltih khawm hrang hrang leh veng hminga kan fehchhuahna te-a kan veng mipui hawiher, kan nungchang leh kan zia hi kan veng tihmingthaa ti hmingchhetu dik tak chu niin ka hria. Hetiang nikhuaa kan chetdan felfai thlap se, kan hmunhma te mitinin vawngfai thlap ila, kan hawiher dik se - hetianga kan awm chuan mi mawl te te awmkhawm pawh ni ila miin min ngaisang ru ang. Nungchang zahawm pu tur hian hausak lam te, zir san lamte a pawimawh lem lo.

Degree nei thuau pawh ni ila ruih hmang leh eiruk ching mi kan niha kan nun duhdah chuan hnunglama nuihzat bak kan tawng dawn lo va. A hun leh hmun a zira nungchang kan hriat loh chuan min thlirtute mit mim a lian ting mai dawn a ni. Hmun pakhata mitthi vuinaah chuan a thenawm chiaha thingpui lum ho chu (ruang awm lai laiin) fiamthu sawiin an nui dur dur reng a, an YMA hruaitute pawh an awm nual leh nghal! Chutiang mite chuan ‘mawl’ nih bak an hlawh lo chawk.

Kan veng hi lehkhabu ni ta se phek mal te hi chhungkaw tin an ni ang a. Chutiang chhungkuaa mimalte chu chung pheka thu inziak te chu an ni ang. Chu lehkhabu that leh that loh chu phektina thu inziak khaikhawm chuan a hril dawn a ni.

Post 17: Sunday Pual - X

RINGTUTE TAWRHNA

Bible-ah hian Pathian mite tawrhna hi a lang hnem hle a. Thuthlung Thar lamah phei chuan ringtute’n Isua hming avangin an tuar tur a ni tih leh an tuarna thu kan hmu hnem viau a ni. Ringtu hmasa te hian eng hnam pawh ni se, eng ram pawh ni se tawrhna / tihduhdahna an hmachhawn zel niin a lang. Tawrhna chungchanga ka rilrua lo lang tlem ka’n tarlang ang e.

Pathian hi Engkimtithei, Engkim chunga Roreltu a ni si a; engvangin nge A mite hian an tawrh a ngaih tlat le? Isua kha Pathian Fapa a ni a, an man dawn zan khan a duh chuan Vantirhkoh tamtak amah chhan turin a ko thla thei tih a sawi a. Pathian hian engkim a tih theih si chuan engati nge tuara hrehawm tak khera min chhandam le!!

Ringtute leh sual indona hi mita hmuhtheih aiin mita hmuh theih loh, thlarau khawvelah hian a nasa zawk a nih ka ring a. A langa ringtute tihduhdah an niha an thih zawih zawiha an martar hian thlarau khawvelah Pathian sipaite nasa takin an chak phah a nih ka ring tlat!!

Sipai, ram tana inpe chuan thih a ngam loh tlat chuan thih ngama rawn beitu ral hmaah a tlanchhe ngei ang a; thih ngama a din tlat erawh chuan hnehna kawng a zawh tihna a ni ang. ‘Charge of the Light Brigade’ te kan zir thin a, mi tlemtein ral hmaa tlanchhe lova an beihdan phuahna poem a ni. ‘300’ film ah pawh Spartan mi 300 lekin Persia ho tam lutuk an lo beihdan kan hmu. An indona chu an thih phah ngei mai; mahse mi tam zawk kai thoa hnehna an chan theihna chhan chu tlanchhe loa an inpek ral raihna kha a ni tlat. Grik lal ropui Alexander-a chak em em chhan kha an sawi dan chuan ‘a tana thi ngam’ sipai a ngah vang niin an sawi tlat.

Pathian hian A tana thi ngam lo hlir ringtu nei ta se engtin nge a ram a zauh belh ang aw? Ring thar awmna apiangah tawrhna a awm a. Isua’n A hminga tawrhna chuan thlamuanna leh engthawlna a chhawm tih a sawi a. Ringtu hmasa te khan Isua hming avanga an tawrhna kha an lawmna a ni tlat! Martar te thisen chu Kohhran chi a ni a; Martar-na hi ringtute chawimawina dawn theih sang ber a ni.

Tunlai Kristian te hian tawrh hi kan hlau ta hle-in a lang a. Hmun hrang hranga ringtu dangte kan tawngtaisak pawhin tawrhna leh harsatna laka humhimna kan dilsak ta fo mai. Mizoramah ngei phei chuan nuam takin rawng kan bawl a, ringtute tan tawrh tur awm lo angin kan sawi fo thin bawk. Hei hi ngaihdan dik lo tak niin ka hria a. Mizoram, Kristian ram inti-ah pawh hian Pathian ringtu tak tak, nawmsakna ngaihtuah lova Pathian thu chauh ngaihsak chu tumahin kan kawm tha peih lo a, mite inpekna leh tawrhna atanga Pathian malsawmna an dawn te ngaihnawm taka kan sawi kan sawi lai hian mahni tana chu malsawmna dawng ve thei tur khawpin mi tam zawk hian kan tuar peih lo a, kan ngam lo thin a ni. ‘Ani hi chu a thlarau mi khawp mai’ tih hlawh tawhte reng reng hi chuan thian pawh an ngah ngai lo a, nula tan ngat phei chuan a mawi lo te kan ti hial thin. Tihdamna Pathianin a pek te kan pan ruih ruih lai hian Pathian hian min pe ve dawn ta se kan tih ve tur lam ti peih lo / ngam lo kan tam zawk ang.

Pathian kan hmangaih a nih chuan A tan kan tuar tur a ni a, A mite chuan pumpelhna leh humhimna zawng lovin chung zawng zawng karah pawh Ama tihchakna kan dil zawk tur a nih ka ring a. Pathian tana inpekna-ah hian ‘Tawrhna’ a tel tlat a, Pathian ram zauhna’n hian ‘Tawrhna’ hi ralthuam pawimawh berte zinga mi a ni tih ka pawm tlat a. Tuar ngam lo tan Pathian ringtu tak tak a nih theih ka ring lo!

Post 16: Asanga

 Asanga: With dad on New Year Day

Asanga: With his Mom 

Asanga: With Mom on New Year Day