Post 5: 1st AMC General Election

VOTE KA THLAK

Vawiin nileng khan Aizawl Municipal Council hmasa ber tur inthlanna chu tluang taka kalpui a ni a. Vote tla zat leh tunge tling dawn tih lam chu ka hre hauh lo a, INTHLAN chungchang hi tlem han sawi zawk teh ang.

Vote thlak hi Democracy ramah chuan mipui chanvo pawimawh tak mai a ni a; a pawimawhzia ngaihtuah lem lo tan chuan ho tak, peihawm lo tak anga ngaih theih a ni. Khawvela Democracy ram lian ber India-ah hian MP leh MLA inthlan ah te pawh vote tla percentage hi chuti lutukin a tha ngai vak lo a. Chuti a nih chuan democracy dana inthlan hian a tling te hian mipui an represent tak meuh em tih hi zawhna awm thei pawimawh tak a ni.

Entirna han siam ila -- Inthlanna-ah candidate 5 lo awm ta se; 50% aia tlem vote tla se, vote hmu sang ber pawhin khalai biala mipui majority kha a represent zo lo tihna a ni ang. Vote lo tla kim vek pawh ni se, a hmu sang berin 40%, a dangte’n 30%, 20%, 5% leh 5% lo hmu ta se: A hmu sang ber chu tlinga puan a ni ang a; mahse a nihna takah chuan amah duh tu 40% leh duh lotu 60% an awm tihna a ni ang. Heti lekah pawh lo lang chiang ta chu Indian multi-party system democracy hian mipui ai a awh zo lo ve thei a, a famkim bik lo a ni tih hi han hre ve mai mai ta ila.

Chutih rual chuan Democracy hi khawvela political system tha berah ngaih a ni tho a. Famkim lohna nei mah se thatna a ngah ber ni tur a ni. AMC inthlan-ah pawh hian result a lo chhuah hunah chuan mipuiin kan beisei ang a ni lo mai thei. Tuna Mizorama party hrang hrangten MLA kan neih dan nen pawh a inkhuangrual lo mai thei a. Thlang tlingtu zat hi chu engzat pawh ni se - vote 1 a tling emaw, vote maktaduai-a tling emaw pawh ni se - thlan tlina ber hian a tlinna bial mipui zawng zawng ai a awh a ni tih a inhriat phawt hi a pawimawh a ni. Min thlang lotu chu ka ngai pawimawh lo ang kan ti a nih chuan ram hmelma leh hruaitu ni tlak lo kan ni tihna a ni ang.

Aizawl-ah Municipal Council kan lo nei dawn ta a. Mizoram-in a la pal ngai loh kawng a zawh dawn a ni a. Councillor thlan chhuah ten taima leh dik taka ro an rel chuan AMC hmasa ber hi hmahruaitu entawn tlakah an siam ang a, a bul a fuh chuan a hnu zel pawh a tluang ngei ang. 'A bul tan that chu a chanve zo ang' tih a nih kha!

******************************************************************

TRIBUTE TO BUONGLIENKUNG

Vawiin hi hla phuah thiam Buonglienkung thih cham a lo ni reng bawk a. Amah hi mimal tak pawn ka ui em em a. Ani hi hlaphuahtu ka ngaihsan te zingah a tel a; a chhan chu a hla te hi Pathian pek, ama nun atanga a phuah an nih thin avangin an hlu ka ti a, a hla thu te a mar nalhin a thluk nen a inhmeh thei em em bawk.

Khawvelah hian hla hi chhiar sen loh an phuah tawhin ka ring a, an la phuah leh zel dawn bawk. Pathian hla, phuah ve tum hrim hrim vanga phuah chawp ve mai tih hriat lutuk hi chuan rilru-ah eng hna mah a thawk thei lo niin ka lo hmu ve a (Lenglawng leh Lengzem hla chu lo hrethiam ta rih ila). Hla phuahtu-in ama nuna a tawn, Pathian a pawl tak takna atanga lo chhuak hla reng reng chu hna thawk lovin a awm ngai lo.

Pathian mi Buonglienkung hi a khawvel tan a uiawm em em; a thlarau chu hlim tawp lovin Chhandamtu kiangah a leng kumkhua tawh dawn a ni.